اجمل رحلة للقاهرة الفاطمية شارع المعز

اجمل رحلة للقاهرة الفاطمية شارع المعز

النهاردة هنكلمك على يوم جميل اوى بنحب نعمله من وقت للتانى .
هناخدك فى رحلة كاملة للقاهرة الفاطمية رحلة فيها كل عبق الزمن الجميل أنه شارع (((( المعز لدين الله الفاطمى ))))

شارع المعز كبير جدا (تخيل كده انه 1000 متر تقريبا) بيبدأ من باب الفتوح مرورا بمنطقة النحاسين وخان الخليلى وبعدين يقطعه شارعين رايح جاى (شارع جوهر القائد اللى هو الموسكى وشارع الأزهر)
عند الغورية والفحامين وبعد كده تكمل على الصاغة وزقاق المدق والسكرية احد باب زويله لو هتيجى بالعربية أفضل حاجه تركنها عند باب الفتوح

ودى البداية باب الفتوح واحد من بوابات القاهرة الفاطمية بيتكون من برجين وبينهم باب عملاق مزين بالزخارف النباتية والهندسية
اول ما تعدى البوابة بتلاقى على شمالك مسجد “الحاكم بأمر الله” اللى بتحس براحة غريبة جدا جواه يمكن علشان الجامع مفتوح
وبتلاقى مكان الوضوء بيضاوى فى نص صحن الجامع بس ننصحك متفوتش قبل صلاة المغرب بحوالى ساعة فى المكان ده لان الجو بيبقى رائع بتشوف غروب الشمس مع العصافير والحمام اللى فى المكان
(خد كاميرا علشان هتحتاجها اوى)

بعد كده بقى نخش على مكان ممكن يكون معظمكم مجربوش لكنه تجربة جميلة ومكان جديد للناس اللى بتشتكى من الروتين “”بيت السحيمى””
اللى بيقدم العديد من الانشطه الثقافية والادبية فى جو أكثر من رائع ..

كمل في حارة الدرب الأصفر على طول هـ تلاقي أمامك “مسجد الظاهر بيبرس أجمل حاجة فيه، السكينة اللي بـ تشعر بها والحمام اللي بـ يبقى على أرض وأعلى سور المسجد (ده علشان سقفه مفتوح)،
لأن المهتمين به دائمًا بـ يحطوا لهم حبوب يأكلوها.
لو رحت المسجد ده هـ تنسى أي جمال شوفته قبل كده وتتمنى تفضل قاعد جنب العصافير تأَكلهم بس.

هـاتخرج من حارة الدرب الأصفر تلاقي “جامع الأقمر” على أيدك الشمال بـ تنزل له سلمتين صغيرين،
وبـيتميز بالكتابة الكوفية المزخرفة على الأعمدة الرخامية.

وأخيرًا “جامع السلطان برقوق” هـتلاقيه أمام سبيل المياة بعد ما تمشي شوية من جامع الأقمر،
واللي بناه السلطان الظاهر أبو سعيد برقوق أول حاكم لمصر من المماليك الجراكسة 1286م– 788 هـ،
هـتستمتع في الجامع ده جدًا بالزخرفة والفنون الهندسية بالذات لو زرته بالليل.

 

 

 

 

 

 

 

 

 

 

 

 

 

 

 

 

 

 

نيجى بقى لاهم حاجة الأكل والشرب لو عاوز تعرف تأكل وتشرب إيه هناك، نحب نقولك أن كل حاجة رخيصة جدًا،
ده غير أن طعمها حلو ولذيذ وبـيدخلك في جو القاهرة الفاطمية.

تخرج من جامع الأقمر وتمشي على طول هـ تلاقي محل “الكيلاني” على يمينك، واللي بـ يقدم كل العصائر المعروفة من تمر وخروب ومانجو وسوبيا وبرتقال،
وعنده ساندويتشات كمان بس إحنا بـ ننصحك لو معدتك بـ تتعب من أكل عربيات الشارع بلاش أحسن،

فيه بعديه محل فطير حلو ونضيف اسمه “الشيف” وبعده بحبة حلوين محل تاني عنده فطير وبيتزا اسمه “شيخ العرب”
كمان هـتلاقي محل “أسماك” السمك بتاعه هايل بعد محل “أسماك” هـتلاقي التجربة اللي بجد مختلفة عند “الضامن” على أيدك اليمين، بـ يعمل كبده ومخ بالسمسم بس خرافة،

بعد كده المحلات اللى ممكن تشترى منها ومتستغلكش
أكتر محل محترم “مكتبة حسام عبد الظاهر” واللي بـ تقدم نوع فريد من رسم اللوح بالخط العربي لكلمات عربية أو بيوت شعر جميلة، وكمان دفاتر كتابة عليها نفس الكلمات وبيوت الشعر، زي حب، سعادة، علم، وحلم.
كمان “محل أ. عاطف عيد” اللي عنده لوحات نحاس (شغل يدوي) رائعة الجمال لشارع المعز وغيره من المناطق الأثرية،
وفيه بازار “السلطان برقوق” اللي عنده أنتيكات من كل العصور بأسعار معقولة، كل قطعة فيه تأخدك لعصر مختلف عن التاني مش بس القاهرة الفاطمية، لأ هـتلاقي عنده تحف فرنسية ويابانية كمان.
كمان بازار “جوهرة المعز” عنده علب صدف بأحجام مختلفة وأذواق عديدة،

نيجي للمحلات اللي من غير اسم، فيه محل جنب بازار السلطان برقوق بـ يبيع كل الحاجات القديمة زي الجرامافون والراديو بتاع زمان وأسعاره معقولة لمحبي التحف.
وفيه كمان عربيات لكل الاكسسوارات اللي تتخيلها بالأحجار الكريمة وبأحجار عادية وبأسعار أقل كتير من أي مكان تاني.

بعد كده هـتلاقي أمامك “حي الصاغة” المعروف بمحلات الذهب والفضة اللي فيه، وكمان محلات عطارة كبيرة هـ تلاقي فيها أي حاجة أنت كنت بـ تدور عليها في محلات العطارة العادية ومش لاقيها،
وبـ تخرج على شارع الأزهر اللي بـ يقطع شارع المعز لدين الله،
وفي الناحية التانية هـ تلاقي الغورية (منطقة معروفة ببيع الأقمشة)، ووكالة الغوري، وجامع المؤيد، وباب زويلة.

وبكده تبقى انتهت رحلتنا في شارع المعز الافضل الصبح بدري جدًا أو قبل المغرب بساعة، استمتع بالتصوير